九龍城寨：期望落差

 

《九龍城寨之圍城》叫好叫座，但對我來說是嚴重期望落差。感受之差去到浪費時間的程度，亦因為不想二次浪費時間，我五月中看，到七月才寫網誌，完全一反常態。

首先戲名有問題，「圍城」一詞不知所謂，我完全睇唔到內容有表達圍困無助的感覺。期望落差，主要因為入戲院前唔知係漫畫改編。宣傳好似冇強調，而呢套漫畫遠不及《龍虎門》、《風雲》等出名，唔講真係唔知。如果早知係漫畫改編，我可能唔入場，因為完全唔識部漫畫，同埋期望內容係城寨生活描寫為主，江湖打鬥場面只係陪襯。

不過就算係武打漫畫改編，係咪就要由頭打到尾？成套戲打得太多，去到煩厭的情度。就算想睇打，戲中的誇張神功式打法，唔啱鐘意睇真功夫的人。如果打少一半，貴精不貴多，另外描寫多啲城寨生活，咁就啱喇。講少少劇情，眾人對陳洛軍(林峯)的感情、拼死力保佢的強烈情度根本講唔通。呢套戲係我極少有睇到覺得浪費時間的垃圾！唯一可取只有嗰啲美學。