5G家居寬頻

 轉用5G家居寬頻一個月了，很滿意，亦確認了一個判斷。

先講歷史，如果只想睇5G寬頻請直接跳去最後兩段。我2001年開始用寬頻，之前係古老的電話線 dialup 33.6K。最初寬頻技術ADSL都係用電話線，速度好似是3M，之後免費升級到6M，最後係現在仍有人用的8M。一個月前我仍然使用龜速的8M寬頻，係呀，從來無用過光纖！

我不是不想用光纖，而是好有可能要由大門拉明線入房，覺得容易意外弄斷，同埋幾不美觀。另外，ADSL容易轉IP address，只要reconnect就得。光纖好似要disconnect幾個鐘再connect才轉到。以前玩 Diablo II，有時唔小心會被暫時lock IP，所以需要快速轉IP來解決。仲有，大廈每年都停一次幾小時的公眾電力，用光纖就上唔到網，但用電話線的ADSL完全不受影響。8M寬頻，正式係叫8Mbps，其實只有6.7Mbps下載，只看數值相當龜速。不過以我多年實際使用經驗，只要係一個人用，同埋用LAN線，在大部份情況都唔覺慢，係夠用。ADSL其實係慢在上載，1Mbps都冇，只有0.6Mbps，真係龜速。最後，ADSL多年來好穩定，也是繼續用的原因。

8M我"忍到"多年，但Netvigator忍唔到我呢啲有光纖都唔轉用的怪人。佢哋8月初出信比我，會在9月提升服務到光纖，月費不變，否則9月14日終止ADSL服務。封信有點誤導，令人以為係提升到1000M光纖，原來都係8M。不過此8M光纖係上下載都有8Mbps，確實比8M ADSL快咗，尤其是上載。於是約了8月28日下午上門拉光纖，點知啲師傅冇厘搭霎，等到下午3點半一個電話或短訊都冇，我仲一早搬開晒啲家私等班大帝。3點半都冇料到，我就打上1000問才知道當日拉唔到光纖，原因係冇線。頂佢個肺，要個客打上台問才知道嚟唔到，簡直係九流管理，完全唔專業。仲要佢哋無法估計幾時才有線。我一直等到9月7日，即係終止ADSL服務前一星期，唔再等Netvigator了，轉台申請3HK 5G家居寬頻。

點解唔試下香港寬頻？上面有提及，我唔喜歡拉明線，同埋可能又會話冇線拉唔到光纖住，唔知又等多幾多日，分分鐘兩頭唔到岸要斷網。5G寬頻有兩大優點：1. 唔使拉線 2. 只要有電又收到5G訊號，router搬去邊都上到網。小優點係唔似得光纖需要大廈公眾電力比上網設備，5G寬頻只需室內電力給router，不受每年一次幾小時的暫停公眾電力保養影響。講完優點講缺點，5G寬頻慢1000M光纖好多，用OFCA測試速度，用LAN線，下載有474Mbps，1000M光纖下載高達9百幾Mbps；上載仲差得遠，只有144Mbps，而1000M光纖上載同下載一樣有9百幾Mbps。5G寬頻還有限量，例如3HK的$118月費計劃就每月首300GB係5G速度，超過用量就可能減速。還有，5G需要modem近窗才接收得好訊號，代表個modem連router難以放在屋中間，全屋的WIFI接收唔平均。

以上三個缺點，頭兩點好視乎使用量和速度需要。數值上5G慢1000M光纖幾多，但我日常使用唔覺得慢。如果經常同時幾個人睇片、直播，或者經常上下載大檔案，當然用光纖穩陣，否則係多餘。唔好因為數值上比其他寬頻慢，就覺得一定要用快啲那個。近排寬頻商推2000Mbps光纖或更快，理論上又快1000Mbps起碼一倍，係咪因此要無止境地追逐速度，改用2000Mbps或以上呢？