鹹水喉

多年來我都話忙而少寫網誌，今年嘅忙去到另一境界。屋宇署命令驗窗又要裝反虹吸管，加上今年屋企特別多東西壞，超忙，最近才叫好啲。今篇講座廁上水喉，用鹹水，多數都用偏硬的膠喉，俗稱筷子喉。

筷子喉好耐用，但因為偏硬，水制出水位和水缸入水位要在適當角度，加上條喉長度剛剛好，條喉才會耐用。好果角度唔適合加上距離近，強行裝筷子喉，長期高壓拉扯就會在駁口漏水，冇得救又要換喉。家中一個座廁就係咁(不是相片中那個咁暢順)，水喉師傅裝的筷子喉，用了兩年左右就在最弱的駁口位，水缸那邊漏水。

我心諗如果再搵人修理，師傅又係強行裝筷子喉，咁唔係辦法。就算膽粗粗自己試下修理，搵唔到代替品，都係唔得。我想過用金屬網喉，但唔適合鹹水，真係冇晒計。拖咗好耐，結果死死地氣想用返筷子喉，上網睇下人點換，或者有甚麼橋妙學到呢！

結果有大發現！有個陳師傅好肯分享技術，佢有條片介紹上水喉，原來網喉的網係有膠造的，咁就唔怕鹹水腐蝕。我當然衝去買條返來試下，26蚊，但我個座廁又有另一個問題。水缸個入口係三分，條喉係四分。咁應該都唔係大問題，加個三分內牙四分外牙的轉駁器，俗稱杯臣就得啦！點知我油麻地行到深水埗，加埋屋企附近的五金舖，都只有金屬杯臣。我相信全香港總有一間舖頭有賣膠杯臣，但點知喺邊？就算上網問過人甚至那位陳師傅都唔知邊間有！最後就在乜都有嘅淘寶買咗幾個，但表面造工質素麻麻，無計啦，叫做解決到個問題。四月尾安裝到現在都無事。

要留意，長度要預長啲，寧願打個圈都要確保冇橫向壓力在接駁口，同埋只可用手擰實，唔好用工具。

官網資料：http://catalogue.tucai.com.cn/index.php/goods/details.html?id=64