龍珠超

最近睇完『龍珠超』(Dragon Ball Super)動畫，真的要多謝玄學家李居明。李居明曾經以玄學角度，提出電視台重播龍珠，就有助對抗武漢肺炎病毒。好似好無稽！

我是龍珠迷，但廿幾年前睇完『龍珠』和『龍珠 Z』就停了。之後的『龍珠 GT』和最新的『龍珠超』從未睇過。雖然喜歡睇，但未大癮到去主動找DVD、網上下戴收睇。如果電視沒有播放就算了。一直沒有跟進，直至今次李居明話播龍珠有助抗疫，就重燃我的龍珠癮！最初只是在Youtube找找龍珠 Z的精華片段，後來發現Facebook有人直播龍珠 Z，就睇了幾日。龍珠 GT也有人直播過，但那幾天唔太得閒睇，加上龍珠 GT不是正史，即是不是原作者鳥山明的手筆，所以算吧。緊接著有人播龍珠超，我也開始追看，但播了十集八集左右就停了。既然開始了，而且算好睇，那我就想找找餘下的。Youtube沒有，結果遠在天邊近在眼前，原來ViuTV網站有得睇！！於是一路睇，平均每日睇五集左右，昨晚終於大結局。

要評價龍珠超，都算好睇，要知道以打鬥為主的故事，難免走上愈打愈勁、難有新意之路。其實龍珠 Z尾段已經有這種感覺，是一個因素令人不會太渴望睇新一輯故事。今次龍珠超動畫在2018年完結，但漫畫版仍有繼續畫，情形又回復當年睇完龍珠 Z的感覺，如果有日動畫版第二季出埋漫畫版餘下故事，那就繼續睇，但不會太渴望。論故事，元祖龍珠屬於細路仔搞笑劇，龍珠 Z好唔同，氣氛比較凝重，較適合成人口味，而龍珠超就介乎兩者之間。時代變了，龍珠超的節奏比龍珠 Z快。論畫功，龍珠超好明顯有電腦製作成份，以前完全以人手畫的時代比不上，有些效果以前難以做到，但我發覺龍珠超某些人手畫的部份，尤其是開頭幾集係明顯唔太夠班。要算最比不上龍珠 Z的地方，一定是配樂。龍珠 Z的配樂簡直又多又正、氣氛一流、百聽不厭！

講開又講，播龍珠有助抗疫，雖然李居明有解釋背後道理，但以我的玄學知識不很理解到。佢主要說係化火毒。不過上年年尾，佢又話今年庚子水重火缺，要多穿綠色紅色衫去補火，跟火毒一說好矛盾。不論如何，我都要多謝佢，畢竟睇動畫有令人年青感覺，加上龍珠的故事係好正面好有力量，睇完人都精神啲！感覺上可能真係有助抗疫！

ViuTV龍珠超：https://www.viu.com/ott/hk/zh-hk/vod/72669/%E9%BE%8D%E7%8F%A0%E8%B6%85

主題曲仍然好正！