金飯碗餐廳

時序上本篇網誌應該早過《第一腸粉》，原本我都不想寫，但寫完《第一腸粉》後覺得本篇好應該寫。上星期六我與父母去黃大仙，並在那裡搵食。龍翔中心的百好素食本來最就腳兼適合我這個素食人士，但以前買過外賣點心覺得不好吃而且價錢貴，加上我聽過有入內幫襯吃飯的都說味道重，所以我不會入內幫襯。這正是不少素食店的問題，可能不少廚師都不是素食者，他們往往不了解不少素食者是喜愛清淡，反而認為因為素食沒有肉味，所以落調味時更重手，弄巧反拙！

我們最後幫襯一間茶餐廳：《金飯碗餐廳》。父母多數去茶樓，極少幫襯茶餐廳，今次破例主要是所有龍翔中心的茶樓都大排長龍，加上金飯碗有一味 "羅漢齋飯" 兼價錢合理！:)我沒有甚麼期望，茶餐廳提供上百款菜色怎會煮得好，心想又是罐頭羅漢齋。不過 "出乎意料" 事件常伴我左右，枝竹、雲耳、矮瓜、鳳尾菇、蘑菇、菜芯全是新鮮煮成，不像是翻熱罐頭貨色 (經入廚幾十年的母親鑑定)。母親叫了肉丸粥，她對食很挑剔，但也讚粥煲得稀杰適中；父親叫了豆腐斑腩飯，豆腐夠淺色。價錢合理，我叫的羅漢齋飯沒有湯沒有飲品(有杯水，真好，我最喜愛飲水)已經是最不抵食，$30；豆腐斑腩飯跟湯或飲品只是 $29。份量不少。唯一缺點是有味精，但香港有幾多間餐廳沒有落味精？最重要是有沒有口喝或其他不適反應，沒有，所以這缺點可以不計。

相比《第一腸粉》，在《金飯碗餐廳》不用等位、地方闊落、價錢合理、一樣煮得好吃，所以甚麼車胎人、食家讚好的餐廳，我們更應避之則吉。順帶一提，幾年前去《蘭芳園》就上了一次當。另外，《金飯碗餐廳》在 Openrice 的評價並不好，4 笑臉 9 OK 13 喊臉，如果不是亂寫或有打手刻意寫衰，必定是我們品味另類！

---

舊blog留言：

阿德 - 試過早餐擋幫襯過呢間，食物 OK，伙記態度非常麻麻，老細睇得下屬幾緊。

• River - 當日伙記態度普普通通。

Chris - 近排在深水埗食lunch, 茶餐廳味道一般, 但價錢的確抵, 快餐連湯 + 飲品, 只是$30, 最平一間見過$25! 幾年前在灣仔食, 無湯都要呢個價!

• River - 灣仔是富豪區，深水埗是窮人區。要講抵食，茶樓下午茶特價時段更抵！