我久不久就行超級市場，看看貨品及價錢，而米是其一必看的食品。我知道糙米比白米有益，但家人較愛吃白米，而且白米比糙米便宜。白米其實由糙米打磨而成，理論上生產白米的工夫比生產糙米多，但為何白米比糙米賣得平？
例如惠康售賣 "御品皇" 泰國糙米，兩公斤裝
$29.5，即 $14.75 一公片，同一品牌的泰國白米，五百克裝
$6.5，只是 $13 一公片。要知道，五百克裝以每公片計在白米中已經是最唔抵，仍然比兩公斤裝糙米便宜超過一成。我想可能是因為糙米產量少，而生產線要跟白米分開，令每公片成本比白米高，加上糙米的健康形象，商人可能會乘機賣貴一些。
最近我見到一個 "合理" 現象(可能只是我一直無留意)，有一個牌子的糙米平過白米，就是 "鴨間稻"。"鴨間稻"是有機米，現轉載
"有機稻場" 網站的有關描述："所謂「鴨間稻」，就是「採用稻鴨合作的耕種農法來種稻 ---- 農夫把鴨子養在田裡，讓鴨子幫忙照顧稻子」...把鴨子養在田裡，他會幫忙吃田裡的害蟲，也會吃農民最頭痛的福壽螺；鴨子的腳一直划水，會把田裡的水弄混濁，雜草就比較發不出來；鴨子的糞便掉在田裡，又是良好的肥料；鴨子在田裡走來走去，會刺激稻子往下紮根，讓稻子長得比較強壯。"
Market Place by Jasons 售賣 "鴨間稻" 有機糙米，1.5 公斤裝
$67.9，有機白米 1.5 公斤裝 $92！糙米平過白米雖然令我覺得合理，但售價本身就貴到飛天，幾合理都難以令人購買。
(2012-10-11 更新)
一生人總要豪一次，早排真的買了一包鴨間稻糙米，計埋超級市場優惠不用 $60。其實豪極都只是幾十元，怎可不試！這台灣米比泰國米肥，煮熟了比泰國糙米滑，我覺得比泰國糙米好食！或者有部份是心理因素，總覺得好一點。
舊blog留言：
Benjamin - River 見你有回應我講多幾句，並非係我陰謀論，我直頭曾經見過點點X賣三合一奶茶(大XX)，試問與有機何干？一些鬧市中的所謂有機店，賣的都是散裝的農產品，絶對冇任何有機認證標籤，但買的人就盲目相信所謂有機店都是有良心的人開的，單方面講個信字，我覺得他們很可憐。好似我屋企下面個條街就有間連「有機」小店，亂擺一些劣質農產品出來，把口同人客講的野係有機既，但全部都係唔新鮮，有乾又瘦既農產品，一般菜販即日清既貨品，個間野分分鐘賣兩三日... 都一樣有人照買... 中國人好慘，政府唔監管，的人就亂咁黎，政府一監管，門檻鬼咁高，又俾的大財團壟斷晒市場... 我都食過超市買既有標籤有機農產品，味道都一樣好唔對路，令我懷疑所謂既標籤，都係隻眼開隻眼閉... 尤其係中國制造，可信性甚低... 其表表者為超X現X農業既產品，已經俾我列入黑名單... 就好似曾經標榜自己有天然牧場，係蒙古大草原養牛既蒙X牌奶制品，若不是爆出毒奶事件，有誰會知他根本沒有養牛，而是從其它奶農處收集回來呢？更甚者加了三聚氰胺都說不知情，這就是中國商人的真面目... 我見到好多有機店賣的菜都很完好無爛的，在天然環境下種菜是不可能發生的，自己種過菜就知... 的菜蟲一定多到你唔信... 除非佢地都係用溫室黎種... 可能佢地落左「有機」殺蟲藥吧...
- River - 以前買過點點綠的有機菜，品質麻麻。大陸野多數都係信唔過，呢樣野我地香港人好清楚。究竟外國野又是否信得過？形象上是的。 說到底，除了自己種或很認識農場主人，又有甚麼方法唔單方面講個信字(即迷信)，守門一關只有憑自己對有機種植的認識，來判斷某瓜菜是否真的有機；其他事情也一樣，我那篇 " 迷信 " 就簡述了迷信是無可避免，唯有對每事多認識。
Benjamin - 呢隻米有一陣係普通超市(吉之島)都見過，好似冇你講個度賣得咁貴... 其實我經驗話我知好多時的標榜有機既小店都食水好深... 真正「有機」係個老細... 所以隨着大型超市開始大量售賣有機食品，個價錢先有望正常番... 仲有我發現一個更不合理的現象，係市面上售賣既所謂有機疏菜，品質好有問題，很多時菜葉都呈現乾澀的狀態，同埋會種到好老先攞出黎賣，的番薯又瘦又乾...究竟係有機種植會搞到的菜咁唔掂，定係個班一向唔多曉種菜既人走去轉行做有機，諗住可以翻身？總之我未見過一見有機疏菜店既產品質素係正常既... 我諗呢的都係中國人既通病啦，佢地唔係用個心黎做有機，淨係諗住賺錢... 我自己中學時就真係試過種有機番茄啦，收成既時候係撲鼻香，周圍的飛禽走獸都黎晒爭食，咁就真係有機啦﹗試問而家邊間有機店既番茄係咁香既呢？真相係好多有機店既番茄都係同無機既同一品種，都係經基因改造左，快大快收成，冇晒味道，止係種既過程唔落化肥，跟住就話係有機... 若果係有機，種棵番茄都幾個月(係真要咁耐)，邊個做？
- River - 下次我去吉之島留意下。Market Place by Jasons 即係高級惠康，唔係小店；惠康都有賣鴨間稻糙米，早幾日特價 $62但缺貨。 我想市面上有機疏菜的問題，多數是來自一般耕種剛轉去有機耕種的菜場，因為土地難以一下子回復自然。你說到基因改造品種唔落化肥當有機，如果係有認證的話咁係好大件事，完全係欺騙，因為有機就一定唔可以基因改造。
Willlawhk - 我以為你講緊"無間道"。
- River - 爛 gag！ ... ... ... 其實我也有咁諗 ...
阿德 - 鴨間稻很有趣。台灣的有關報導：http://www.youtube.com/watch?v=E7QnJdzqi8o 看完才知連白米也要灑高強度農藥，看來我應中毒太深。 如果有細包的鴨間稻，白米也好、糙米也好，我都想試試。
- River - 我覺得 1.5 公片已經很細包。
留言
發佈留言