澳門賽車

澳門賽車每年我都有看，但最無癮之處，是經常因為意外要暫停比賽，導致往往難以連續比賽七個圈或以上，看 Safety Car 和吊雞車更多。

 意外多因為賽道窄，我會覺得澳門賽道只適合電單車比賽。電單車比較少因為意外而暫停比賽，容易一氣呵成，但今年卻出現集體偷步事件，亦有說是大會的起步訊號混亂所致，於是賽了不足一圈就叫停，重新開始。英國車手 Easton 好快就搶得領先位置，並做出全場最快圈速 2:25.17。Easton 由於一早帶出拋離，之後一直安全駕駛，"慢" 到 2:28 一圈也有，比機會人島車手 CUMMINS 可以後來居上。CUMMINS 以穩定的 2:26-2:27 一圈漸漸縮短差距，在最後兩圈追過 Easton，Easton 如夢初醒，好快又爬過 CUMMINS，可惜這兩個超車鏡頭，電視都影不到！最後一圈，有慢車阻撓下 ，CUMMINS 再無機會超前，Easton 順利首名衝線。

路車挑戰賽也是有趣的賽事，因為多不同款式的車。今次路車挑戰賽，大家一心想看排頭位，香港車手丘永材駕駛的新戰神 GTR 35大戰三輛路筍，點知出乎意料(世事往往如是)，新戰神起步慢，給路筍爬過，並在第一次入葡京灣時沉不住氣，急於行內線重奪首位，但因此而太遲剎車導致推頭撞欄，提早收工！大戰一早完場，以為就此沒有甚麼好看，點知起步排位第廿一的日本車手谷川達也，駕駛 RX8，逢車過車，最終奪得亞軍！可惜無線沒有播足全場，刪去中間幾圈，十分無癮。

其餘電視有播出的賽事，不甚吸引。以上兩場好看的賽事，就是因為少停賽，有足夠時間你追我逐，打心理戰。順帶一提，以前我經常玩賽車遊戲時，深深體會到賽十幾廿幾個圈，連續半個至一小時的比賽，那種落後都有得追，對手會一時鬆懈犯錯，同時自己要維持專注力的比賽狀態，樂趣無窮。

(相片來源及資料參考：http://www.macau.grandprix.gov.mo/app/home/gp56/cn)

---

另外，我真的估不到，無線的歌星毒已入侵澳門賽車，好像甚麼節目都要搬一些歌手出來，唱唱歌、跳跳舞，才有足夠娛樂性，連續兩天唱歌，時間亦不短。其實安排歌手表演，給現場觀眾欣賞，本來無問題，問題是電視應該多播出比賽片段、訪問、花絮等，不是浪費時間轉播那些經常有得看又與賽車沒有關係的歌星表演。

---

舊blog留言：

Chris - 本來我都幾 like睇賽車, 但TVB 播就真係無晒癮, 10圈賽事, 抄車無左2~4圈, 又播下廣告, 點睇ar !  我諗要俾錢睇收費電視 至可以睇足全場!  

希望NOW TV 無左英超, 遲下可以平平地俾我淨係裝ESPN / Star Sport 睇F.1 !

• River - 以前 TVB做得較好，今年特別差。唔通故意迫人睇收費電視？

HHuman路人甲 - 我喜歡欣賞不同車款呀^^

Willlawhk - 同感，最憎炒車。 歌手出來唱歌跳舞都未夠無聊，無記個主持d旁述先悶死你，廢話多到Miss左d車過車鏡頭都算，竟然夠膽死話觀眾最鍾意睇炒車，真係專業冇朋友。

• River - 我唔憎炒車，不要炒到暫停比賽就得，賽兩三個圈就停係好無癮。

Kingmanyi - 波子王撞牆追林保都好精彩呀!

• River - 我出了街，那場我無睇！